БИШКЕК, 27-июл. — Sputnik. Орозо айында быйыл өлкө боюнча 33 миллион 668 миң 886 сом битир-садага чогултулду. Бул тууралуу муфтияттан маалымдашты.
Ага ылайык, чогулган каражат казыяттарга, райондук хатибият жана мечиттерге арыз менен кайрылган майыптарга, кароосуз калгандарга, жетим-жесирлерге таратылып берилүүдө.
"Быйыл топтолгон битир-садагадан муфтият жана облустук казыяттар биригип, Ош облусунун Өзгөн жана Чоң-Алай райондорундагы жаратылыш кырсыгынан жабыр тарткандарга 2 миллион 800 миң сом жардам көрсөткөн. Мындан тышкары, 395 миң сомдук гуманитардык жардам көрсөтүп, жалпысынан 3 миллион 200 миң сомдук жардам берилди", — деп айтылат маалыматта.
Муфтияттын билдиришинче берилип келген жардамдын натыйжасында 2016-жылы Кыргызстан кайрымдуулук жаатында дүйнөлүк деңгээлде 83-орундан 17-орунга чыккан.
Быйыл битирдин баасы 1 адамга 1 килограмм 600 грамм буудайдын баасына барабар болуп, базар баасы менен алганда 30 сомдон эсептелди.
