БИШКЕК, 26-июл. — Sputnik. Премьер-министр Сооронбай Жээнбеков КРдин 2017-2026-жылдардагы Ирригацияны өнүктүрүү боюнча мамлекеттик программасын бекитүү боюнча өкмөттүн токтомуна кол койгондугу жөнүндө министрлер кабинетинин маалымат кызматы билдирди.
Республикадагы сугат инфраструктурасынын басымдуу бөлүгү 30-40 жыл жана андан ашык убакыттан бери иштеп келе жатат.
Маалыматка караганда, калктын саны өсүп бара жатканына байланыштуу жаңы сугат объектилерин курууга жана сугат жерлерин кеңейтүүгө талап жогорулай баштаган.
"Мамлекеттик программа сугат инфраструктурасын куруу менен региондордун тургундарын жаңы сугат жерлери менен камсыздоону көздөйт. Сугат жердин жетиштүү көлөмдө болушу социалдык-экономикалык абалды жакшыртып, региондорду өнүктүрүүгө өбөлгө түзөт", — деп айтылат билдирүүдө.
Аталган программанын алкагында 66,5 миң гектар жер сугат жана айдоо тилкесине айланат. Анын ичинен 51,08 миң гектарына суунун барышы жакшыртылып, 9,5 миң гектары техника аркылуу эмес, өз алдынча аккан суу менен сугарылмакчы. 50 миң гектар жер семиртилет.
