Сууга түшкөнү баргандар бири-бирин карап, жаш балдардан көзүн албашы керек. Бул тууралуу Sputnik Кыргызстан агенттигине ӨКМдин Бишкек шаардык куткаруу кызматынын башчысынын орун басары Мелис Назарбеков билдирди.
Анын айтымында, сууга көбүнчө жаш балдар жана мас адамдар чөгүп кетет.
"12 жашка чейинки балдарды сууга түшүрүүдө алардын жанында көз салган ата-энеси же чоңураактары болушу керек. Атургай суу жээгинде ойноп отурган баланы да улам карап турбаса көз ачып жумгуча аны таппай калышыңыз мүмкүн. Ошондой эле сууга ичимдик ичип түшкөнгө таптакыр эле тыюу салынат. Анткени мас адам сууга киргенде алыс кетип, сүзө албай калат. Акыркы учурда мас абалында сууга түшүп, чөгүп кеткен фактылар көп каттала баштады", — деди Назарбеков.
Мындан сырткары, куткаруучу тааныш эмес жерлерден да абайлап сууга секирбесе, башы-көзү жарылып жаракат алып калуу толук мүмкүн экендигин кошумчалады.
