БИШКЕК, 21-июл. — Sputnik. Аз күндүн ичинде дүйнөлүк хит болгон пуэрто-рикалык ырчы Луиса Фонсинин Despacito ырын Малайзиянын мамлекеттик телерадиолорунан берүүгө тыюу салынды. Бул тууралуу Associated Press агенттиги жазып чыкты.
Малайзиянын байланыш министри Салех Саид Керуак бейшемби күнү ырдын текстинде адепсиз сөздөр камтылган деп коомчулуктун арыздануусунан улам тыюу салынганын билдирген.
Ырды өкмөттүк радио жана телеканалдардан гана берүүгө тыюу салынган. Бул чечим жеке менчик телерадиолорго жана YouTube каналына тиешелүү эмес.
Пуэрто-рикалык ырчы Луиса Фонсинин Despacito ыры интернетте болуп көрбөгөндөй рекорд жаратып, жарым жылдын ичинде 4,6 миллиард адам уккан. Ал эми YouTube каналында бул ырдын клиби үстүбүздөгү жылдын январь айында жарыяланып 2,5 миллиард колдонуучу көргөн.
