Сулайманкулов: Араванда селден жабыркагандарга жеңилдетилген насыя берилиши мүмкүн
Араванда селден жабыркагандарга жеңилдетилген насыя берилиши мүмкүн. Бул тууралуу Өкмөттүн Ош облусундагы өкүлчүлүгүнүн басма сөз катчысы Жумамидин Сулайманкулов Sputnik Кыргызстан радиосуна маек куруп жатып билдирди.
Эске сала кетсек, 8-9-июль күндөрү Араван районунда катуу жааган жаандан улам сел жүргөн. Анын кесепетинен улам бир канча турак-жай колдонуудан чыккан.
"Аравандын Кичи-Алай айылындагы селден жабыркаган тургундар көчүрүлөт. Учурда аларга Кең-Сай массивинен жер аянттары бөлүнүп берилди. Буюрса жеңилдетилген насыя берүү маселеси каралууда", — деди Сулайманкулов.
Белгилей кетсек, буга чейин эл менен КР өкмөтүнүн Ош облусундагы ыйгарым укуктуу өкүлү Таалайбек Сарыбашов жолугуп, көйгөйүн уккан.
