БИШКЕК, 7-июл. — Sputnik. Социалдык тармактар жашообуздун бир бөлүгүнөн кенен орун алып калды. Сүйүнсөк да, кайгырсак да виртуалдуу досторубузга айтып, атургай катылган таланттарыбыз ушул жактан ачылып жатат.
Мындан улам Sputnik Кыргызстан агенттиги апта ичинде соцтармакта популярдуу жана кызыктуу делген сүрөт, видеолор топтомун сунуштайт.
Эшиктен кирсе болбойбу? Шаңдуу музыканын коштоосунда үлпөт көйнөкчөн келе жаткан келинди жеңелери эки жагынан жөлөп-таяп терезеден үйүнө киргизип жатышат. Видеону Нурхан Султанов аттуу колдонуучу жүктөгөн. Видео Казакстандын айылындарынын биринде тартылганы айтылууда.
Жылдыз болуш бир паста. Терезеден кирген келинге таң калып жатсак Ат-Башынын Арпа жайлоосунда боз үйдү сахна, шыпыргыны гитара, жиликти микрафон кылып чимириле бийлеген "келин" чыга келди. Эмне дейбиз таланты ташкындай берсин!
Келинге күйөө баладан жооп. Көпкө узабай эле жайлоодогу "келинге" кымыздан кере жутуп алып бийлеген кара тору "күйөө бала" жооп берди. Өзгөчөлүгү бийине эшегин да катыштырган.
Нихандын тою. "Сокур сүйүү" сериалындагы башкы каарман Неслихан Атагүл (Нихан) үлпөт тоюндагы бактылуу ирмемдерин соцтармактагы достору менен бөлүштү. Видеонун астына "Жашоодогу эң мыкты күн. Сенин бар экениң мени кубандырат" деп жазып күйөөсүн белгилеген.
Жеңелердин тойдогу ат көтөргүс кызматы. Эгер той айылда өтсө жеңелердин башы ашканадан чыкпай, тойдун аягына чейин идиш жууп отурган болот. Аксана Арипова аттуу колдонуучу тойдон кийин ашканадагы көрүнүштү Facebook тармагына жүктөгөн.
Despacito кыргыз кызынын аткаруусунда. Толгонай Арзыкеева көз тайгылткан сулуулугу жана тамшанткан мукам үнү менен Instagram тармагын багынтууда. Үнүңө береке жаш сулуу!
Кечиккен талант. Казакстандык 78 жаштагы Марьям Амираева небереси менен рэп айтып чыгып көпчүлүктүн көңүлүн өзүнө бура алды. Апанын өзгөчө таланты тууралуу эл аралык ЖМКлар дагы жазышты.
Рэпер апага "жооп". Ырчы Сыймык Бейшекеев концертинде аксакал атанын "Нарындан жазган салам катты" катыра ырдаганын өздүк баракчасына жарыялады. Эл ичи – өнөр кенчи!
