БИШКЕК, 6-июл. — Sputnik. Баткендик эки өспүрүмдү аталарынын иниси туугандар арасындагы пикир келишпестиктен улам өлтүрүшү мүмкүн экендигин Sputnik Кыргызстан агенттигинин кабарчысына ИИМдин маалымат кызматынан билдиришти.
Эске салсак, 5-июлда Баткенде эки агасынын жаш балдарын муунтуп өлтүргөн деп шектелип 21 жаштагы жаран кармалган.
"Өлтүрүлгөн балдар 9 жана 10 жашта болгон. Учурда адам өлтүрүүнүн негизги себеби катары туугандар арасындагы пикир келишпестик каралып жатат. Алдын ала маалыматтарга караганда, окуя өтө кыска убакыттын аралыгында, бирок бир эле бөлмөнүн ичинде болгон эмес. Ошондой эле кылмышка шектелген адам өлтүрүлгөн тестиерлердин биринин атасы үйгө келип калганда качып чыгыптыр", — деп айтылат билдирүүдө.
Ошондой эле өзүнүн туугандарынын балдарын өлтүрүүгө шектелип жаткан жаран мурда Россияда жүрүп, мыйзам бузган учурлары болгону да айтылды.
Учурда адам өлтүрүү фактысы боюнча КР Кылмыш жана жаза кодексинин 97-беренеси (Киши өлтүрүү) менен кылмыш иши козголуп, шектелүүчү убактылуу кармоо жайына камакка алынды.
