БИШКЕК, 5-июл. — Sputnik. Ош облусуна караштуу Кара-Суу районунун тургуну, үч эмдин энеси Кызжибек Мариповага жардам көрсөтүлөрүн өкмөттүн маалымат кызматынан кабарлашты.
Буга чейин бир катар ЖМКлар жети жаштагы үч эмдин атасы жубайы кош бойлуу экенин билгенден кийин үй-бүлөсүн таштап кеткенин жазып чыгышкан. Балдар (эки бала бир кыз) жети айлык болуп төрөлүп, кийин көрүүлөрү начарлай баштаган.
Алгач жалгыз бой эне батирде жашап келген. Бирок дарыланууга кеткен чыгымдардан улам апасынын үйүнө көчүүгө аргасыз болгон.
Сооронбай Жээнбековдун тапшырмасы менен вице-премьер министр Чолпон Султанбекова медициналык жана социалдык жардам көрсөтүү маселесин өз көзөмөлүнө алды.
Эми Саламаттык сактоо министрлиги менен Социалдык өнүгүү министрлиги Марипова менен анын балдарына тиешелүү жардам көрсөтүү максатында иш алып барууда.
