Террорчулардын таш-талканын чыгаруу кыргыз аскерлеринин колунан келет, бирок аларды эффективдүү жана бат жок кылуу үчүн аба күчтөрү керек. Бул тууралуу КРдин коопсуздук жана чек ара маселелери боюнча мурдагы вице-премьери, Кыргызстан элинин ассамблеясынын төрагасы Токон Мамытов Sputnik Кыргызстан радиосуна маек куруп жатып билдирди.
Анын айтымында, терроризмге каршы күрөш натыйжалуу жүрүүдө.
"Учурда ЖККУга мүчө мамлекеттер чек араларын бекемдеп, терроризмге каршы күрөшүүдө натыйжалуу иштерди жасоодо. Кыргызстандын аскерлери жердеги операция учурунда террорчулардын таш-талканын чыгара алат. Бирок аларды эффективдүү жана бат жок кылуу үчүн аба күчтөрү керек", — деди Мамытов.
Ал президент Алмазбек Атамбаевдин Россияга болгон сапарынын алкагында журналисттерге жооп берип жатып Кыргызстандын түштүк аймагына аскерий база ачуу тууралуу айткан оюн колдой турганын кошумчалады.
