БИШКЕК, 28-июн. — Sputnik. Россиянын Мамлекеттик думасындагы бардык саясий күчтөр Кыргызстандын карызын жоюуну колдойт. Бул тууралуу Мамдуманын төрагасы Вячеслав Володин Жогорку Кеңештин төрагасы Чыныбай Турсунбеков менен жолугушуу учурунда айтты.
Россиянын Володин башында турган парламенттик делегациясы Бишкекке 28-июнь күнү келди. Тараптар тар жана кеңейтилген чөйрөдөгү жолугушууларды өткөрдү.
"Презитентибиздин Кыргызстандын карызын жоюу боюнча чечимин колдоого алдык. Саясий көз карашына карабастан кесиптештерибиздин баары бул туура чечим экенин айтышууда. Анткени бул стратегиялык өнөктөштүккө багытталган кадам болду", — деди Володин.
Мамдуманын төрагасы 240 миллион доллардык карызды кечүү Россия тарабынан жасалган боордоштук мамиле экенин белгилеп, эки өлкөнүн парламенттер аралык алакасынын маанилүүлүгүнө токтолду.
Володиндин өлкө башчысы Алмазбек Атамбаев менен да жолугушуусу пландалган.
