Былтыр күзүндө КРдин Эл артисти Элмирбек Иманалиев казактардын акындар айтышына катышып, кызыктыруучу сыйлыкка татыган. Алп акындын алганы көптөр үчүн татыксыздай сезилген. Бул тууралуу жаш акын Асылбек Маратов билдирди.
"Ошол маалда Элмирбек агабыз Эл артисти наамын алып, ага кошумча отчеттук концертин берээр алдында Казакстандын Кызыл-Ордосуна экөөбүздү чакырып калышты. Экинчи турда өзүмдү айта албайм, бирок, Элмирбек агабыз казак акыны Сара Токтомусова менен айтышканда жакшы ырдаган. Ошондой алп акын өзү барып жатса, алдыңкы орундардан берип коюшса дурус болмок деп ойлогонбуз", — дейт Маратов.
Анын айтымында, кыргыз акындары өткөргөн айтыштарда эки элдин достугун чыңдоо максатында кош байге уюштурулуп келет. Кош байгеде эки тараптын тең мыктылары аныкталып, пикир келишпестик аз болот. Эми мындай ыкмага казак туугандар да кызыгууда.
