Эске сала кетсек, Мамлекеттик Думанын Коргонуу комитетинин жетекчиси Владимир Шаманов РИА Новости агенттигине Россиянын Сирияга Кыргызстандын жана Казакстандын аскерлерин киргизүү боюнча сүйлөшүүлөр жүрүп жатканын тастыктаган. Ага чейин Түркия президентинин өкүлү Ибрагим Калын Россия Сирияга аталган эки өлкөнүн аскерлерин киргизүү сунушун айтканын билдирген.
"Сирия боюнча маселе такыр көтөрүлгөн эмес. Россия президенти Владимир Путин менен кечки тамакта чогуу болдук. Анда да бул тууралуу сүйлөшкөн жокпуз. Негизи мындай маселе оңой менен эле чечилип калбайт. Эгерде бул маселе көтөрүлө турган болсо, биринчи кезекте ЖККУга мүчө мамлекеттердин чечими зарыл. Анан БУУнун резолюциясы, Жогорку Кеңештин чечими керек", — деди мамлекет башчысы.
Атамбаев президенттик мөөнөтү бүткөнчө маселе көтөрүлбөй тургандыгын айтып, кийинчерээк тажрыйба алмашуу максатында каалоочулар гана барышы мүмкүн экендигин кошумчалады.
