БИШКЕК, 23-июн. — Sputnik. Кыргызстан өз аскерлерин Сирияга киргизүү боюнча маселе үстүндө сүйлөшүүлөрдү жүргүзгөн жок. Бул тууралуу Sputnik Кыргызстан агенттигине Коопсуздук кеңешинин төрагасы Темир Жумакадыров билдирди.
Эске сала кетсек, Мамлекеттик Думанын Коргонуу комитетинин жетекчиси Владимир Шаманов РИА Новости агенттигине Россиянын Сирияга Кыргызстандын жана Казакстандын аскерлерин киргизүү боюнча сүйлөшүүлөр жүрүп жатканын тастыктаган. Ага чейин болсо, Түркия президентинин өкүлү Ибрагим Калын Россия Сирияга аталган эки өлкөнүн аскерлерин киргизүү сунушун айтканын билдирген.
"Сирияга Кыргызстан менен Казакстандын аскерлерин жөнөтүү боюнча маселе Жамааттык коопсуздук жана кызматташтык уюмунун туруктуу өкүлдөрүнүн кеңешинде көтөрүлгөн. Бирок бул боюнча Кыргызстанга расмий кайрылуу түшө элек", — деди Жумакадыров.
Ал ошондой эле тиешелүү кайрылуу келип түшсө сөзсүз түрдө карала турганын кошумчалады.
