Эки адамдын өмүрүн алып, сегиз адамды жабыркаткан Ысык-Көлдөгү кырсыктын келип чыгуу себеби 15 күндөн кийин белгилүү болот. Бул тууралуу Экологиялык жана техникалык коопсуздук боюнча мамлекеттик инспекциясы Sputnik Кыргызстан маалымат агенттигине кабарлады.
Инспекциянын Өнөр жай коопсуздугу жана тоо кенин көзөмөлдөө башкармалыгынын башчысы Максат Абдылдаевдин айтымында, комиссия кырсык болгон жерде иштей баштады.
"Директордун буйругу менен 20-июнда комиссия түзүлгөн. Учурда алар кырсык болгон жерде иштей башташты. Комиссия өрттүн келип чыгуу себептерин мыйзам боюнча 15 күн ичинде аныктайт. Соттук-медициналык экспертиза өңдүү бир катар текшерүүлөр жүргүзүлөт", — деди Абдылдаев.
Эске сала кетсек, 19-июнда болжол менен саат 17.22лерде Ананьево айылынын Совет көчөсүндө май куюучу жайдын жанынан газ баллондор жарылган. Мындан эки адам каза таап, 8 адам ооруканага жеткирилген. Учурда жабыркагандардын төртөө жандандыруу бөлүмүндө жана хирургия бөлүмүндө үч жаран дарыланууда.
