18-июнь эл аралык аталар күнүнө карата Sputnik Кыргызстан агенттиги өлкөдөгү саясат, маданият тармагындагы өкүлдөрдүн аталары тууралуу материал даярдады.
Сабырбек Жумабеков, медицина илимдеринин доктору, ортопед
"Ар бир жасаган эмгегимди атам менен бөлүшөм"
Азыр ар бир операциямдын алдында атам менен сүйлөшөм, жетишкен ийгиликтерим болсо атам менен сүйүнүчүмдү бөлүшүп өзүм менен өзүм сүйлөшүп алам. Азыр да бул эскерүүнү атам жасап берген тапчанга отуруп жазып жатам. Ал киши өмүрүнүн баарын элине, айылына арнады. Ак эмгегине ыраазымын!
Керим Турапов, Кыргыз Эл артисти, опера ырчысы
"Атам, ээнсиреген жалгыз там…"
Азыр баамдасам, атам кыргызда айтылган куйма кулак адамдардын бири болгон экен. Үйгө кишилер көп келип, алар атамдын айткандарын угуп, каткырып, бир оокумга чейин отурушаар эле. Жакшы ырдап, эпостордон тарта тарыхый романдарды мыкты биле турган. Кээде балалык кыялым менен чогулгандарды жактырбай, колтугуна кирип алып, түрткүлөп, "ата, бул кишилерди кетирчи" дечүмүн.
Кийин мен окууга келип, жогорку ноталарды билип, үйрөнгөнгө аракет кыла баштаганда анан атамдын ким экенин түшүндүм. Бир ирет бийик нотаны сунуштасам, атам жөн эле, кыйынчылыксыз алып койду. А мен ошол ноталарды ырдайм деп беш жыл окуп отурбаймынбы. Көрсө, атамдын эске тутуусу менен музыкалык туюму укмуш экен да. Апам эрте өтүп кетти. Ага болгон сагынычымдан улам "түндүгүнөн түтүн булатып, апам жапкан нанды сагынам" деген саптарым жаралды. Мен айылга барган сайын аксакалдарды, байбичелерди чогултуп, куран окутуп, эскерип келем. Бул адатка айланган. "Атаңды көргөн өлбөсүн" демекчи, бул менин атам менен апамды эскерүүм, аларга болгон жолугуум…
Кубат Оторбаев, акыйкатчы
"Атам көп жылдан бери Ат-Башынын аба-ырайына байкоо салып келет"
Менин атам биздин айылга эле эмес, ошентип, мага да мугалим. Ушул күнгө чейин акылын айтып, камкордугун көрсөтүп, калкалап келет. Мен ага, албетте, ыраазымын.
Элдияр Кененсаров,"Азия MIX" командасынын капитаны
"Ата, сага ыраазымын!"
Эскерүү бул эң жакшы көрүнүш. Өткөндү эстегенде кайрадан ошол жакка жакын адамдарыңды алып кетип калгың келет. Бул жайда азыркыга чейин эч нерсе өзгөргөн эмес. Ал жерде сага бардык үй, ар бир бак-дарак, ар бир үй-бүлө ал тургай жолдон өтүп бара жаткан жолоочу да тааныш. Бул жай сага эч качан өзгөрбөй эсте сакталып калат. Ошол жайды көрсөткөнү үчүн ата, сага ыраазымын!!!
(Элдияр Кененсаров атасынан 18 жашында айрылган)
Айсулуу Мамашева, ЖК депутаты
"Атам үчүн секелек кызмын"
Атасынын кызы деп айтканда эч тартынбайм, тескерисинче, абдан сыймыктанам. Анткени менин атам эң даанышман, мээримдүү, адамкерчиликтүү, аракетчил, билимдүү адам.
Кудайыма атам үчүн ыраазымын!!! Чоңойсом деле атам экөөбүз чогуу жүргөндө ал мени колуман жетелеп алат. Бул учурда бактым, кубанычым койнума батпай кетет. Атам үчүн мен дале секелек кызмын. Биз үчүн жасаган ар бир эмгегиңиз үчүн сизге ыраазычылык билдирем. Атаке, бар болунуз!
Алия Шагиева, президент Алмазбек Атамбаевдин кызы
"Чыгармачылыкка менин жакын болуума атам таасир тийгизген"
Президент Алмазбек Атамбаев гитаранын коштоосу менен ырдап чыкканда кызы Алия Шагиева өзүнүн Facebook баракчасынан атасын мыкты аткарган ыры менен куттуктап, аны жакшы көрөөрүн айткан.
"Ичине эмне деп жазганымды көрсөтпөйм. Себеби, аруу, таза нерселерди баарына жар салгым келбейт. Жакшы көрөм, жакшы көрөм, жакшы көрөм! Гитаранын коштоосундагы ыры менен куттуктайм. Ал эс алдырган, жылмаюу тартуулап, өмүрдү узарткан жан дүйнөсүнө жакын иш менен алектенгенине абдан кубанычтамын. Ооба, ал сүрөт тартчу. Жакында эле анын тарткан сүрөттөрүнүн альбомун барактап чыктым. Чыгармачылыкка менин жакын болуума атам таасир тийгизген. Сизге чоң рахмат!" — деп жазган Шагиева.
Рысбай Исаков, манасчы
"Атамдай адам болууга далалаттанам"
Менин атам Рахман ырга ышкылуу, шайыр адам болгон. Жанындагыларды тамашасы менен тамшандырып, күлкүгө бөлөп жиберээр эле. Атайын кесип кылбаганы менен, эргүүсү келген учурлары ыр жазып калчу. Балдарга карата катуу сүйлөп, урушканын да уккан жокмун. Улуттук оюндардан ордого ышкыбоз болуп, бош учурда кайыштан камчы өрүүнү жакшы көрчү. Мүнөзүнүн жөнөкөйлүгү менен теңтуштарынын алдында кадырлуу болгон. Турмуш жолунда атамдай мүнөз күтүп, атамдай адам болууга далалаттанам…
