БИШКЕК, 16-июн. — Sputnik. Канаданын Жогорку соту канадалык Centerra Gold Inc. компаниянын бенефициардык менчиги боюнча соттун чечимин ачык типтеги "Кыргыз алтын" акционердик коомунын пайдасына чыгарды. Сот компаниянын аппеляция боюнча арызынан баш тартты. Бул туурасында КРдин соттошуп жаткан өкүлчүлүгү билдирди.
"Доогерлер Centerra компаниясындагы акциялар юридикалык жактан "Кыргыз алтынга" тиешелүү болгону менен иш жүзүндө акция ээси Кыргызстан экендигин айтып, арбитраждык соттун республикага каршы чыккан чечимдерин Centerra ишканасындагы акцияларын камакка алуу менен ишке ашырууну айтышкан", — деп айтылат маалыматта.
Онтарионун Жогорку соту доогерлердин аргументтерин четке кагып, 2016-жылдын 11-июлундагы чечими менен Кыргызстан Канададагы компаниянын ачык типтеги акционердик коомго катталган акцияларынын ээси эмес деп тааныган. Онтарио соту доогерлердин доо апелляциясын четке каккандан кийин алар Канаданын Жогорку сотуна арызданган. Аталган сот төрт компаниянын апелляциясынан баш тарткан.
"Ошентип Кыргызстанга карата төрт арбитраждык соттун чечими жана мындан аркы дагы арбитраждык чечимдер Centerra компаниясындагы акцияларды камакка алуунун эсебинен аткарылбайт", — деп жазылган маалымат.
Ачык типтеги акционердик коом "Кыргыз алтындын" эсебине катталган Канададагы 11, 8 миллион доллар жакында эскроу эсебиндеги камактан бошотуларын жана жогорудагыдай доолордон арылаарын билдирди. Эскроу — белгиленген мөөнөткө чейин мүлктөр, документтер менен акча каражаттары кармалып турган атайын эсеп.
Ачык типтеги "Кыргыз алтын" акционердик коому Centerra Gold Inc., компаниясынын "Кумтөр" алтын ишканасы иштетип жаткан 33 пайыз акциясына ээлик кылат.
