БИШКЕК, 26-июл. — Sputnik. Канаданын Онтарио провинциясынын Жогорку соту "Кыргызалтын" ишканасынын Centerra Gold Inc. компаниясындагы бардык акцияларын камактан чыгарды. Бул тууралуу аталган ишкананын маалымат кызматы билдирди.
Эскерте кетсек, акциялар "Кыргызалтын" активдеринин эсебинен Кыргызстанга каршы чыккан арбитраждык чечимдердин аткарылышы боюнча жүргөн соттук териштирүүнүн алкагында камакка алынган.
Таратылган билдирүүдө учурда "Кыргызалтын" ААКтын акциялары менен дивиденддерине эч кандай чектөө жок экени айтылат.
Буга чейин (2011чи жана 2014-жылдары) төрт компания — "Манас Банк" ЖАКтын акционерлери, В. Белоконь, түрктөрдүн Sistem Muhendislik Insaat Sanayi ve Ticaret Anonim Sirketi, Stans Energy Corp компаниясы жана Entes Industrial Plants Construction & Erection Constructing Co. Inc. компаниясы Онтарионун жогорку сотуна кайрылган. Алар Кыргызстандын эл аралык арбитраждык чечимдерди аткаруусун талап кылышкан.
