БИШКЕК, 14-июн. — Sputnik. Уулу менен топ талаша кеткен баланы аёосуз сабап салган аял кылганына катуу өкүнүп жатканын укук коргоочу уюмдардын өкүлдөрү айтууда. Мындай маалыматты Sputnik Казакстан агенттиги жазып чыкты.
Эскерте кетсек, Алматыда жаш келиндин тестиер баланы аёосуз сабаганы видеокамерага түшүп, социалдык тармакта кызуу талкууну жараткан.
Балдардын укугун коргоо боюнча бейөкмөт уюмдун координатору Ришат Рахимов менен Роза Акылбекова ушу тапта баланын баш мээси чайкалып, психологиялык жактан да жабыркаганын айтышууда.
"Биз аялдын өзү менен да сүйлөштүк, жабыркаган Женянын да ата-энесине жолуктук. Бала моралдык жактан жабыр тартыптыр, психологдун жардамына муктаж экени көрүнүп турат. Ал эми келин ыйлап-сыктап, жасаганына абдан өкүнүп жатканын айтты", — дешти алар.
Ушу тапта бейөкмөт уюмдардын өкүлдөрү сотко чейинки териштирүүнүн материалдары менен таанышып, иликтөөнүн жүрүшү Казакстандын адам укугу боюнча ыйгарым укуктуу өкүлү Аскар Шакировдун жеке көзөмөлүндө турарын айтышты.
