БИШКЕК, 13-июн. — Sputnik. Түркиянын Анталья шаарында 24 жаштагы кыргызстандык жаран каза болгонун Sputnik Кыргызстан агенттигинин кабарчысына Түркиядагы кыргыз диаспорасынын өкүлү Давлет Жантаев кабарлады.
Анын айтымында, каза болгон улан жүрөк оорусу менен жабыркап жүргөн. Анын эмнеден каза болгондугу туурасында экспертизанын толук жыйынтыгы 2,5 айдан кийин белгилүү болот.
"Буга байланыштуу Антальяда жашаган кыргызстандыктар акча чогултуп жатышат. Сөөктү мекенине жөнөтүү үчүн жалпы эки миң доллар керектелет. Учурда каражаттын көпчүлүк бөлүгү чогулуп калды. Мындан сырткары, юридикалык маселелери чечилсе сөөктү жөнөтө алабыз", — деди Жантаев.
Ошондой эле ал каза болгон жаран эки жылдан бери Түркияда иштеп жүргөнүн кошумчалады.
