БИШКЕК, 11-июн. — Sputnik. Президент Алмазбек Атамбаев 11-июнда "Таза Коом" программасынын эл аралык форумуна катышты. Бул тууралуу Өлкө башчынын маалымат кызматы билдирди.
Ага ылайык, форумга БУУнун башкы катчысы Антониу Гутерриш да катышты.
"Кыргызстанда нефть менен газ жок. Бирок күчтүү жарандык коом бар. Ошондуктан эркин Кыргызстанды курабыз. Биздин күч, биздин байлык бул элибиз. Ошол үчүн "Таза Коом" программасына басым жасап жатабыз", — деди президент.
Атамбаев ошондой эле "Таза коом" программасы үч багыт боюнча ишке ашырыларына токтолду. Алар:
- ыңгайлуу жөнгө салуучу чөйрө түзүү, санариптик кызмат көрсөтүү, маалыматтарды ачык кылуу;
- заманбап инфраструктура түзүү;
- адамдардын мүмкүнчүлүктөрүн өнүктүрүү.
Өлкө башчы "Таза коом" программасынын шарапаты менен коррупциянын деңгээли төмөндөп, эң ылдыйкы чекке түшүшү мүмкүндүгүн да айтты.
"Бийликтин бардык кабаттарында коррупцияны жеңүү аздык кылат, коррупция участкалык милиционердин, участкалык дарыгердин, айыл өкмөтүнүн атка минеринин денгээлинде дагы болбошу керек", — деди Атамбаев.
Мамлекет башчысы БУУнун башкы катчысы Антониу Гутерришке форумга келгени үчүн ыраазычылык билдирип, "Таза Коом" программасы ишке ашса коррупция азайып, бизнеске жакшы шарттар түзүлөөрүн кошумчалады.
