Бишкек шаарынын мэриясынын "Жашылдандыруу курулуш" муниципалдык ишканасы 15 жылдан бери биринчи жолу Кара-Жыгач токоюнда жайгашкан Комсомол жана Пионер көлдөрүнүн түбүндөгү чөгүндү, тунмаларды тазалоо иштерин жүргүзүүдө. Бул туурасында мэриянын маалымат катчысынын милдетин аткаруучу Калперизат Айдарбекова Sputnik Кыргызстан радиосуна билдирди.
Анын айтымында, көлдөрдү тазалоо иштер атайын пландалган программасынын алкагында өткөрүлүп жатат.
"Пионер жана Комсомол көлдөрүнүн түбү алты гектарды түзөт. Ал эми тунманын жалпы аянты 0,7 гектар. Бүгүнкү күндө 80 пайызы тазаланып бүттү. Тазалоо иштери бүткөндөн кийин шаардык санитардык-экологиялык көзөмөл борбору көлдөрдүн сууларын текшерет жана лабороториялык анализдердин жыйынтыгына карата сууга түшүү мезгилинин убактысын белгилейт", — деди Айдарбекова.
Мэрия өкүлү сууга түшүү мезгилинин ачылышы тууралуу кошумча билдиришээрин айтты.
