БИШКЕК, 9-июн. — Sputnik. 2017-жылдын ичинде быйыл туулган эки миллион козуга бруцеллезго каршы эмдөө жүргүзүү пландалып, бүгүнкү күндө иштин 40 пайызы бүттү. Бул тууралуу Sputnik Кыргызстан агенттигине Ветеринардык жана фитосанитардык коопсуздук боюнча мамлекеттик инспекциянын Жаныбарлардын ден-соолугун көзөмөлдөө башкармалыгынын башчысы Мурат Абдраев билдирди.
Эмдөө жылына бир жолу 4-5 айлык козуларга жүргүзүлүп, малдын иммунитети төрт жылдан ашык сакталат.
"Жаш малды эмдөөгө июнь-август айлары эң оптималдуу мезгил. Учурда иштин 40 пайызын бүттүк, калганын августка чейин бүтөбүз", — деди Абдраев.
Маалыматка караганда, бул эмдөөнү ишке ашыруу үчүн "Мал чарбасын жана рынокту өнүктүрүү" долбоорунун алкагында 2 миллион вакцина 143 миңден ашуун долларга сатып алынган.
