БИШКЕК, 5-июн. — Sputnik. Магнитогорск шаарындагы заводдун директору Кыргызстандын 30 жаштагы жаранын көчөдөн атып салды. Бул тууралуу Урал News маалымат агенттиги ИИМдин Челябинск облусу боюнча башкы башкармалыгынын маалымат кызматына таянуу менен билдирди.
Ага ылайык, кырсык жекшемби күнү саат 9:00дөр чамасында Клубничная көчөсүндө болгон.
"КАУР" ЖЧК ишканасынын директору Кыргызстандан келген 30 жаштагы киши менен уруша кеткен. Кайым айтышуу олуттуу жаңжалга чейин жетип, директор мылтыгы менен мигрантты эки жолу аткан", — деп айтылат маалыматта.
Анын кесепетинен КР жараны балтырына жана таманына ок жеп ооруканага жаткырылган. Окуя болгондон кийин укук коргоо органдарынын өкүлдөрү директордун үйүнөн үч аңчылык мылтыгын огу менен табышкан.
Учурда окуянын чоо-жайы такталып, кылмыш ишин козгоо маселе каралууда.
