БИШКЕК, 5-июн. — Sputnik. Катар бир катар араб мамелкеттеринин койгон айыбын четке кагып, террорчулук менен экстремизмге каршы күрөштө өз милдетин так аткарып жатканын расмий кабарлады. Мындай билдирүүнү өлкөнүн Тышкы иштер министрлиги таратты.
Мындан тышкары, Сауд Аравия башында турган Араб коалициясы Доханын Йемен операциясына катышуусуна бөгөт койгон.
"Катар мамлекети Перс булуңунун араб өлкөлөрүнүн кызматташуу кеңешинин мүчөсү катары анын уставын сактап, башка мамлекеттердин суверенитетин урматтап, эч кимдин ички ишине кийлигишпейт. Муну менен бирге террорчулук менен экстремизмге каршы күрөштө өз милдетин так аткарып келет", — деп айтылат билдирүүдө.
Катар үч ири өлкөнүн диломатиялык мамилелерди үзүшүн алардын өз оюн жана эркин таңуулоо деп түшүнөрүн, "мындай аракеттин өзү суверенитетке доо кетирип жатканын" белгиледи.
