БИШКЕК, 5-июн. — Sputnik. "Альфа Телеком" жабык акционердик коомун (MegaСom соода маркасы) сатуу боюнча аукцион өтпөй калды. Бул тууралуу Мамлекеттик мүлктү башкаруу фондунун маалымат кызматы билдирди.
Ага ылайык, аукционго катышуу үчүн бир дагы табыштама келип түшкөн эмес. Компаниянын баштапкы баасы 13,5 миллиард сом деп бааланган. Аукциондун жеңүүчүсү жалпы нарктан сырткары жети пайыздык комиссия төлөшү керек болчу.
"2-июнда саат 17-00гө чейин "Альфа Телеком" ЖАКтагы мамлекеттин 100 пайыз акциясын сатуу боюнча аукционго катышууга табыштама түшкөн эмес. Андыктан аукционго даярдануу жана өткөрүү боюнча ведомстволор аралык комиссия белгиленген мөөнөттө табыштама түшпөгөндүктөн аукционду болбой калды деп тапты", — деп айтылат маалыматта.
100 пайыз акциясы мамлекетке караган ири уюлдук операторду сатууга былтыр эки ирет аракет көрүлгөн. Биринчи жолкусунда баасы 19 миллиард сом деп бааланса, экинчисинде 14,3 миллиард сомго чейин түшкөн. Экөөндө тең компанияны сатып алууну каалагандар чыкпай, аукцион ишке ашпай калган.
