БИШКЕК, 5-июн. — Sputnik. Бишкектин Шопоков көчөсүндөгү унаа токтотуучу жайга акы төлөнө баштады. Ушу тапта тесттик версия ишке киргенин мэрия билдирди.
Жыл башында мэриянын сынак комиссиясы автоматташтырылган паркинг үчүн Шопоковдун Москва көчөсүнөн Жибек Жолу проспектисине чейинки бөлүгүн бөлүп берген. Аны конкурста жеңишке жетишкен жеке ишкер Сергей Попов ижарага алып иштетмей болгон. Учурда Шопоковдун Фрунзе көчөсүнөн Чүйгө чейинки бөлүгүндөгү унаа токтотуучу жайларга акы төлөнө баштады.
Бир унааны токтотуу үчүн алгач 40 сом алынат. Алгачкы 15 мүнөт бекер болмокчу. Маалыматка ылайык, азырынча жаңы жайда унаалардын токтотулушун тескөөчү адамдар иштеп жатат, эми төрт айдын аралыгында паркомат сатып алуу пландалууда.
Мындан тышкары, саатына төлөм алуу кызматы да ишке кирмекчи, баасы болжол менен 25 сом болору аныкталды.
Жердин ижарасынан мэрия жылына эки миллион сомдон ашуун каражат тапмакчы.
