БИШКЕК, 2-июн. — Sputnik. Бишкек мэриясынын Билим берүү башкармалыгы 7-июндан 30-июнга чейин мектептердин алдында окуучулар үчүн жайкы лагерь уюштурат. Бул тууралуу мэриянын маалымат кызматы билдирди.
Ага ылайык, 38 мектептин алдында түзүлө турган лагерге 3 миң 430 окуучу тартылат.
Лагерлер саат 8:00дөн 14:00гө чейин иштеп, 32 мектептин окуучулары үчүн эртең мененки жана түшкү тамак уюштурулат.
Окуучуларга дене тарбия, таанып билүүчү, эстетикалык жана көңүл ачуучу иш-чаралар уюштурулат.
"Авиамоделдөө ийрими, спорттук оюндар ойнолуп жана башка мелдештер уюштурулат. Жалпысынан мектеп алдында уюштурулган лагерде 100дөн ашык ийрим иштеп, ага 3 миңден ашык бала тартылат", — деп айтылат маалыматта.
Окуучулардын көңүлдүү жана ыңгайлуу эс алуусу үчүн спорт аянтчалары иреттелип, атайын пландар иштелип чыккан.
