БИШКЕК, 30-май. — Sputnik. Азык-түлүк өндүргөн 28 кыргызстандык компания Евразия экономика биримдигинин бирдиктүү реестрине киргизилди. Бул тууралуу өкмөттүн маалымат кызматынан кабарлашты.
Ветеринардык жана фитосанитардык коопсуздук боюнча мамлекеттик инспекциянын төрагасы Калысбек Жумакановдун айтымында, эми ата-мекендик өндүрүшчүлөр дүйнөлүк базарга көйгөйсүз чыгат.
"Кыргызстанда эпизотиялык абал туруктуу жана дүйнөлүк базарга чыгууга тоскоолдуктар жок. Ошондой эле ЕАЭБдин курамына кирбеген үчүнчү өлкөлөр менен кызматташууга да көңүл буруп жатабыз. Азыр өлкөдөгү тоок фабрикаларынын продукцияларын Кытайга экспорттоо үчүн келишимге кол коюлат", — деди Жумаканов.
Реестрге кирген компаниялар ЕАЭБ курамындагы мамлекеттерге өз товарларын эч маселесиз чыгара алат.
