БИШКЕК, 29-май — Sputnik. Ош облусунда 40 жаштагы аял өзүн-өзү күйүүчү май менен өрттөп салды. Бул тууралуу Ош облустук ички иштер башкармалыгынан Sputnik Кыргызстан агенттигинин аймактык кабарчысына билдиришти.
Маалыматка ылайык, 28-майда түнкү саат 23:00дө Кара-Суу районунун Төлөйкөн айылында жашаган 40 жаштагы аял мас болуп күйөөсү менен уруша кеткен. Чырдан кийин келин өзүнө май чачып өрт коюп жиберген.
Ош облустук ички иштер башкармалыгынын басма сөз кызматынын өкүлү Жанна Сатарбаеванын айтымында, жубайлар буга чейин эле жаңжалдашып келишкен.
"Күйөөсүнүн айтымында, ал аял анын экинчи жары. Жубайы спирт ичимдигин ичүүнү адат кылып алган. Күйөөсү түнкү саат 22:00дөр чамасында үйүнө келип, бирок ачкыч жок кире алган эмес. Аялына телефон чалса, ал мас абалында жооп бере албай, түнкү cаат 23:00дө үйүнө кирген. Күйөөсү аялын акыркы кездерде көп ичип кеткендигин айтып экөө чырдаша кетет да, келин үйүндө турган күйүүчү майды өзүнө чачып, өрт коюп жиберген. Эркек аны куткарып калуу үчүн төшөнчү жаап өрттү өчүрүүгө аракет кылган. Тез жардам аялды облустук ооруканага алып кеткен", — деди Сатарбаева.
Ошондой эле аялын сактап калууга аракет кылган күйөөсү эки колу күйгүзүп алганын кошумчалады.
Ош облустар аралык клиникалык оорукананын директору Шайырбек Сулаймановдун айтымында, аял жандандыруу бөлүмүндө абалы оор бойдон жатат. Дарыгер келин денесинин 60 пайызын күйгүзүп алганын белгиледи.
