БИШКЕК, 29-май — Sputnik. Баткен районуна караштуу Кызыл-Бел айылындагы Тажикстан менен чектешкен аймактагы жаңы конушка суу жеткирүү аракеттери көрүлүп жатат. Бул тууралуу аймактык кабарчы жеринен билдирди.
Эгер какыраган талаага суу барса 600 кожолуктан турган айыл түптөлүп, чек ара бекемделерин айылдык кеңештин депутаттары билдирген.
"Иш суу менен гана бүтүп калбайт. Жаңы конушка жол, социалдык объектилер курулушу керек", — деп эл өкүлү Нармат Дарвешов айтууда.
Учурда Кызыл-Бел айылынан аталган чек ара аймагына суу жеткирүү үчүн түтүктөр жаткырылып жатат.
"Түтүктөрдү орнотуу үчүн беш миллион сомго жакын каражат бөлүнгөн. Учурда аларды жаткыруу иштери жүрүп жатат", — деп "Кызыл конуш" ичүүчү суу керектөөчүлөр коомунун жетекчиси Мастура Надирова билдирди.
Анын айтымына караганда, түтүктөр эл аралык уюмдардын каржылоосу жана жергиликтүү элдин салымы менен орнотулуп жатат.
