БИШКЕК, 28-май — Sputnik. Жусуп Баласагын атындагы Кыргыз улуттук университети жаңы ректорду шайлады. Бул тууралуу окуу жайдын маалымат кызматынан кабарлашты.
Билдирүүгө караганда, шайлоого профессордук-окутуучулук курамдан 1344 адам катталып, добуш берүүгө 1216 мугалим катышкан. Ал эми ректорлукка жети адам ат салышкан.
Жашыруун добуш берүүнүн жыйынтыгы:
- Канат Садыков — 776
- Таалайбек Каракеев — 264
- Туратбек Суранаев — 66
- Нур Саралаев — 58
- Асель Абакирова — 7
- Зарема Казанбаева —7
- Гурас Жапаров — 5 добушка ээ болду.
"Шайлоодо 27 адам талапкерлерге каршы болсо, алты бюллетень жараксыз деп табылды. Добуш берүүнүн жыйынтыгы менен алдыңкы үч орунга чыккан талапкерлер Билим берүү министрлиги тарабынан өкмөткө сунушталып, алардын бири ректорлукка бекитилет", — деп жазылат маалыматта.
Эске салсак, Кыргыз улутттук университетинин мурдагы ректору Чынара Адамкулова 6-апрелде кызматынан бошотулуп, ТИМдин алдындагы Дипломатиялык академиянын жетекчилигине дайындалган.
