БИШКЕК, 24-май — Sputnik. Токмок шаарынын ички иштер бөлүмүндөгү кызматкерлердин бири аялды муунтуп кыйнаган деп шектелип жатат. Бул тууралуу Башкы прокуратурадан кабарлашты.
Мекеме жабырлануучу милицияга 11-февралда эле арыз жазып кайрылганын аныктаган. Аял милиция кызматкери өзүнүн кызматтык кабинетинде аны муунтуп кыйнаганын билдирген.
Башкы прокуратура 13-мартта материалдарды Улуттук коопсуздук комитетине жиберип, соттук-медициналык экспертиза дайындалган. Анын жыйынтыгында жабырлануучу жеңил жаракат алганы аныкталып, УКМК кылмыш ишин козгоодон баш тарткан.
Бирок 22-майда чечим Башкы прокуратура тарабынан четке кагылып, милиционерге карата Кылмыш жаза кодексинин 305-1 беренеси (кыйноо) жана 305-беренеси (кызматтык абалды кыянаттык менен пайдалануу) боюнча кылмыш иши козголду.
Иликтөө иштери УКМКнын тергөө башкармалыгына өткөрүп берилди.
