БИШКЕК, 24-май — Sputnik. Кара-Кулжа районунда 26 миң калкты тейлей турган Коомдук алдын алуу борбору ачылып иштей баштады. Бул туурасында аймактык кабарчы билдирди.
Борбордун ачылышына Ички иштер министринин биринчи орун басары Сүйүн Өмүрзаков жана жергиликтүү бийликтин өкүлдөрү катышты.
Аталган борбор Кара-Кулжа районунун борбору Кара-Кулжа айыл өкмөтүндөгү төрт айылдын 26 миңге чукул жашоочусун тейлейт. Борбордун максаты — айыл аймагындагы укук бузууларды алдын алуу, калк арасында түшүндүрүү иштерин жүргүзүү, коомчулук менен биргеликте коомдук тартипти көзөмөлдөө.
"Борборду Кара-Кулжа айыл өкмөтүнүн башчысы координациялайт. Аталган борбордо аксакалдар соту, аялдар кеңеши, жаштар комитети, аймактык тескөөчүлөр биргеликте коомчулук менен иш алып барат. Жарандар укук бузуулар тууралуу кат түрүндө же оозеки кайрыла алышат", — деп Ош облустук ИИБдин басма сөз катчысы Жеңиш Аширбаев айтып берди.
Маалыматка ылайык, борбордун курулуш иштери үчүн Кара-Кулжа айыл өкмөтү 700 миң сом бөлүп берсе, эл аралык уюмдар эмеректер менен камсыздоого көмөктөшкөн.
