БИШКЕК, 24-май — Sputnik. Бишкектеги “Дыйкан — Пишпек” базарын милиция курчап турганын ШИИБдин маалымат кызматы билдирди.
Аталган соода жайы 24-майдан тарта жабылмак. Мэрия буга базардын нефть базасына жакын жаайгашканын, мындан улам кооптуу экенин жүйө келтирген.
Базардын жетекчисинин орун басары Талип Ташибаев милиция кызматкерлери “20дай адамды РИИБге алып кеткенин” айтып берди.
“Милиция базардагы жолду жаап, баарын таратып жиберди. Чогулгандарды РИИБге алып кетишти. Бул маалда соодагерлер ишин аяктап, базарда болчу”, — деди ал.
Ал эми укук коргоо органдарынын өкүлдөрү эч ким кармалбаганын, айрым адамдар түшүндүрүү иштери үчүн РИИБге алып келиниши мүмкүн экенин белгилешти.
Чагымчыл аракеттер болгонун Ленин районунун акими Нурлан Тынаев да тастыктап, бирок учурда соодагерлердин басымдуу бөлүгү жаңы жерге көчүп, абал туруктуу экенин белгиледи.
