БИШКЕК, 20-май. — Sputnik. Караколдук окуучу баланын кыска метраждуу тасмасы эл аралык кинофестивалдын катышуучусу болду. Бул тууралуу "Кыргызстан — кыска метраждуу тасмалар өлкөсү" эл аралык кинофестивалынын арт-жетекчиси Ника Жолдошева билдирди.
Караколдон чыккан 8-класстын окуучусу, жаш режиссер Батыркан Ильясовдун "Кошуналар" аттуу кыска метраждуу анимациялык тасмасы 21-майда Торонто шаарында өтө турган эл аралык FOCUS балдар кинофестивалынын сынактык программасына катыша турган болду.
Анда 16 жаштан ылдыйкы курактагы балдардын анимациялык тасмалары ат салышат.
Жаш режиссердун аталган эмгеги улуттук "Карек" балдар кинофестивалында "Мыкты анимация" категориясында баш байгени жеңген.
Ушул эле тасма 2016-жылдын жаз айында Бишкекте өткөн "I Love English" видеороликтер сынагында да алдыңкы орунду багындырган.
Батыркан анимация менен үч жылдан бери алектенет.
