Өзгөчө жана кооз! Ысык-Көлдүн жээгинде өткөн марафондун асмандан көрүнүшү

Ар жылы май айында Ысык-Көлдүн жээгинде Кыргызстандагы эң ири Run the Silk Road марафону өтөт. Бул жолу аталган мелдешке Россия, Казакстан, Япония өлкөлөрүнөн келген спортчуларды кошкондо эки миңден ашык адам катышты.

Марафон Чолпон-Ата шаарындагы ипподромдо башталып, катышуучулар Корумду айылын көздөй чуркап барып, кайра ат майданга кайтып келишкен.

Мелдеште 1-орунду кыргызстандык Илья Тяпкин алып, ал 2 саат 35 мүнөт 26 секунддун ичинде 42 чакырым 195 метр аралыкты багынткан. Ал эми аялдар арасында баарынан биринчи болуп кыргызстандык Мария Коробицкая чуркап келген. 

Жарым марафондун (21 чакырым 97 метр) жеңүүчүлөрү болуп эркектер арасында Султан Айдар уулу (Кыргызстан) жана аялдар арасында Катерина Шатная (Казакстан) аталышты.

Жеңүүчүлөр 1000 доллар акчалай сыйлык менен сыйланышты.

Run the Silk Road эл аралык марафону алтынчы жолу уюштурулуп жатат. Былтыркы жылы спорттук иш-чарага 1800 адам катышкан. Мелдеш Кыргызстандан чыккан жалгыз марафончу, 1980-жылы Олимпиада оюндарында үчүнчү орунду багынткан Сатымкул Жуманазаровдун элесине арналат.