Кыргыз фермерлери Болгарияда кой кыркуу боюнча мелдештен байге алышты

БИШКЕК, 14-май — Sputnik. Болгарияда өтүп жаткан мал чарбачылыгы боюнча фестивалга Кыргызстандан барган төрт фермер катышууда. Бул туурасында Sputnik Кыргызстан агенттигине фермер Баатырбек Акматов билдирди.

Аталган фестиваль 12-майдан 14-майга чейин уланат. Анын алкагында койдун жүнүн кыркуу боюнча мелдеш уюштурулуп кыргыз фермерлеринен Элдос Алышеров менен Баатырбек Акматов алдыңкы орундарга жетишип 50-100 евро акчалай сыйлык алышкан.

"Мындай мелдеш болорунан кабарым жок, даярданбай эле келгем. Анан жөн эле күчүмдү сынап көрөйүнчү деп ары жактан бир кайчы сатып алып чыктым. Менден башка дагы алты өлкөнүн чабандары катышты. Натыйжада биринчи, экинчи орунду болгариялыктар алып, мен үчүнчү орунга жетиштим. Бул мелдеш эртеси да уюштурулуп Элдос Алышеров аттуу фермерибиз экинчи орунду багындырды", — деди Акматов.

Ошондой эле ал фестивалда мал чарбачылыгы жана айыл чарбасына багытталган техникалардын, азык-түлүктөрдүн көргөзмөсү уюштурулаганын кошумчалады.

"Бул фестиваль быйыл 6-ирет өткөрүлүүдө. Биз экинчи жолу катышып жатабыз. Жалпы жонунан 23 мамлекеттен фермерлер келиптир. Бири-бирибиз менен тажрыйба алмашуулар жана атайын окуулар өтүүдө", — деди фермер.

Белгилей кетсек, Баатырбек Акматов Кыргызстанда асыл тукум койлорду багуу менен алектенет. Ал мал чарба өндүрүшүнүн новатору, эки жолку социалисттик эмгектин баатыры, Кыргыз ССРнин мал чарбасына эмгек сиңирген устат Таштанбек Акматовдун баласы.