Базардын айланасынан машинаңыз менен өтүп баратып, кызыл жарыкка токтоп калдыңыз дейли. Бирок жашыл күйгөндө деле кишилердин токтобой өтүп жатканын элестетсеңиз. Өтүп кетейин деп машинаңызды ордунан козгогондо капоттон ары бир чаап "каякка жанталашып?!" деген кыйкырыкты уктуңуз… Мындай маселе менен базардын жанынан өткөн ар бир айдоочу тааныш болсо керек.
"Жөө адамдар бул жерде турган жол чыракты такыр этибар алышпайт. Өзүңөр деле карасаңар, мына, өтүп жаткандардын бирөө дагы аны карап койгон жок. Машина өтүп жатабы, баары бир. Айрымдары кызыл жарыкка өтүп баратканын билбей кээде капотту чапкылашат", — деген пикирин таксист Sputnik Кыргызстан агенттигинин кабарчысына айтып берди.
Жолдон өтүү эрежесин бузгандарга 200 сом айып салынат. Бирок иш жүзүндө жөө адамдарга айып деле салынбайт, болгону эскертүү гана берилет.
