БИШКЕК, 8-май. — Sputnik. Бишкекте мотоцикл менен Mercedes кагышканын Sputnik Кыргызстан агенттигине күбө маалымдады.
Анын айтымына караганда, жол кырсык түнкү саат 2.00дөр чамасында Байтик баатыр менен Токомбаев көчөлөрүнүн кесилишинде катталган.
"Жолдон өтүп баратып эвакуаторду байкадым. Жанында бир нече мотоциклчен адамдар бар экен. Ошондой эле жерде мыйрыйган мотоцикл жатканын анын ары жагында жеңил унаа турганын байкап калдым", — деди күбө.
Бишкектин Кайгуул милициясы жол кырсык болгонун ырастады.
"Токомбаев көчөсү менен батышты көздөй Mercedes үлгүсүндөгү унаа менен мотоцикл кетип бараткан. Унаа сол тарапка кайрыла баштаганын байкабай калган мотоциклчен киши унааны сүзүп кеткен", — деп маалымат кызматынан маалымдашты.
Мотоцикл айдаган адам жаракат алып ооруканага жеткирилген. Ал эми автоунаанын айдоочусу жабыркаган эмес.
Эки транспорттук каражат айып короого токтотулду.
