БИШКЕК, 6-май — Sputnik. Премьер-министр Сооронбай Жээнбеков Бишкек – Кара-Балта жолунун оңдолушу менен жеринен таанышты. Бул тууралуу өкмөттүн маалымат кызматы билдирди.
Жээнбеков аталган жол стратегиялык маанидеги жол экенин айтып, аны оңдоого бөлүнгөн каражаттын сарпталышы жана сапаты тыкыр көзөмөлгө алынарын баса белгиледи.
Андан сырткары, тендерди утуп алган компания аң-чөнөктөрдү оңдоо иштерин 20-майга чейин аякташы керектигин айтты.
"Он күндөн кийин келип оңдоо иштеринин жүрүшүн жана компаниянын Бишкек – Кара-Балта жолун оңдоо боюнча иштеринин башталышын текшерем. Аталган жолдун маанилүүлүгүн эске алуу менен оңдоо иштери 24 саат бою жүрүшү керек. Ошол эле учурда анын сапатына көңүл бурулушу зарыл", — деди Жээнбеков.
Өкмөт башчы, андан сырткары, Чүй облусунун Маловодное айылындагы оор жүк ташыган машиналарды текшерүү пунктунун иши менен таанышты.
