БИШКЕК, 6-май. — Sputnik. Былтыр Кант шаарында аялды муунтуп өлтүрүп, короосуна көөмп койду делген шектүү киши колго түшүрүлдү. Бул тууралуу Чүй ОИИБ маалымат кызматы кабарлады.
Бейшемби күнү милиция кызматкерлерине Кант шаарындагы үйлөрдүн биринен аялдын сөөгү казып алынганы тууралуу маалымат келип түшкөн. Аймактык инспектор үйдү текшерип короодон 30-35тер чамасындагы аялдын сөөгүн жатканын көргөн. Окуя болгон жерге ыкчам-иликтөө тобу барган.
"Натыйжада үйдүн 34 жаштагы ээси кармалып, кылмыш жасаганын мойнуна алды. Анын айтымында, 2016-жылы күз мезгилинде аялы жана анын курбусу менен спирт ичимдигин ичип отуруп, тааныш келин менен чатакташып кеткен. Кылмышка шектүү делген адам ошол жерден аялынын курбусун муунтуп өлтүрүп, өзүнүн үйүндөгү короого көөмп койгон", — деп жазылат маалыматта.
Кармалган адамга Кылмыш кодексинин 97-беренесине (Адам өлтүрүү) ылайык кылмыш иши козголуп, учурда тергөө иштери уланууда. Ошондой эле киши колдуу болгон келиндин аты-жөнү такталууда.
