БИШКЕК, 3-май. — Sputnik. Кыргызстандык дизайнерлер Марсель Шейшенов менен Канат Карапашов "Molocow" деген аталыш менен сүт азыктарынын таңгагын жасап, "The Dieline Awards – 2017" эл аралык фестивалынын жеңүүчүлөрү болуп табылды. Сынактын жыйынтыктары фестивалдын расмий сайтына жарыяланды.
Марсель Шейшеновдун айтымында, кыргызстандык дизайнерлердин иши "Concept" категориясында мыкты деп табылган.
"Биздин иштеп чыккан эмгегибиз сынакка коюлган 1600 эмгектин арасынан эң мыкты деп табылды. Биз АКШда өткөн сыйлык тапшыруу салтанатына катыша албай калганыбыз менен абдан кубанып жатабыз", — деди Марсель Шейшенов.
Сүт азыктарынын "Molocow" аталышындагы таңгагы кыргызстандыктар тарабынан өткөн жылдын башында жасалган. Кутунун оозу учуучу тарелканын формасына окшош. Ал айнек кутуга жабылганда учуучу тарелка жерге жарык берип, уйду көтөрүп бараткандай элес берет. "Molocow" — "сүт" менен "уй" дегенди билдирет.
The Dieline Awards — таңгактардын дизайнына багытталган сынак 2009-жылдан бери өткөрүлүп келет. Байгелүү орундарды алгандарга алтын кубок тапшырылып, алардын идеясын ишке ашыруу үчүн келишим түзүлөт.
