БИШКЕК, 30-апр. — Sputnik. Премьер-министр Сооронбай Жээнбеков бүгүн Ош облусуна болгон сапарынын алкагында кооптуу тилкелерди кыдырып, табигый кырсыктын кесепеттерин көрдү. Бул тууралуу ккмөттүн маалымат кызматынан билдиришти.
Өкмөт башчы Жазы дарыясынын нугунун өзгөрүшүнө байланыштуу Бишкек — Ош унаа жолунун суу каптоо коркунучунда турган 610-чакырымын көрдү.
Өзгөчө кырдаалдар министринин орун басары Равшанбек Рысбаев маалымдагандай, учурда жээктерди бекемдөө иштери жүргүзүлүүдө.
"Азыркы кезде он даана атайын техника иштеп жатат, алар зарыл болгон көлөмдө күйүүчү-майлоочу материалдар менен камсыз болгон. Жергиликтүү тургундардын курулуш муктаждыгынан улам дарыянын жээгиндеги топурактын ташылып кетиши да жээктердин жуулуп кетүүсүнө алып келүүдө", — деди Рысбаев.
Премьер-министр Сооронбай Жээнбеков дарыя жээгин толук жуулуп кетүүсүн болтурбоо жана суунун деңгээлин убактылуу кармап туруу үчүн кошумча жээк бекемдөөчү дамбаны элүү метрге кеңейтүүнү тапшырды.
"Бул боюнча чечим кабыл алуу үчүн тез арада кооптуу тилкелерди аныктоо зарыл. Эгерде суунун деңгээли кескин көтөрүлө турган болсо, Бишкек — Ош жолундагы көпүрөнү алып кетүүгө түздөн-түз коркунуч жаралат. Бардык зарыл болгон каражаттар жетиштүү", — деди Жээнбеков.
Мындан тышкары, премьер-министр Өзгөн районундагы Төрт-Көл айыл аймагындагы көчкү алдында калуу кооптуулугу күч Ийри-Суу, Чангет жана Зергер айыл өкмөтүнүн тургундары үчүн бөлүнүп жаткан жер участкаларын көрдү.
