БИШКЕК, 28-апр. — Sputnik. Бүгүн эртең менен тарбиячынын жардамчысы ыйлап келип, өз каалоосу менен арыз жазуу менен иштен бошонуп кеткенин Sputnik Кыргызстан агенттигине №142 бала бакчанын директору Равшан Абдуллина билдирди.
Директор мындай көрүнүшкө жол берилбеши керектигин белгилеп, буга чейин аял мындай жоруктарга барбаганын айтты.
"Ал арыз жазуу менен өзүнө туура келбеген чөйрөгө түшүп калганын билдирди. Социалдык тармактардагы комментарийлерди окугандан кийин кетүүнү туура көрүптүр. Учурда аябай кейип жатат. Ага азыр тийишпей эле койгон оң. Бул окуяга чейин ал өзүн жакшы тарабынан көрсөтүп келген", — деди директор.
Бала бакчанын жетекчилиги тарбиячы дизайнерлик кесип боюнча билим алып, бул жакка чөнтөк чыгымдарын табуу үчүн февраль айында ишке орношконун маалымдады.
