БИШКЕК, 28-апр. — Sputnik. Бишкек шаарында Аскер кызматкерлери үчүн салынган 27 батирлүү үйдүн ачкычтары ээлерине тапшырылды. Бул тууралуу КР Куралдуу Күчтөрүнүн Генералдык штабынан билдиришти.
Маалыматка ылайык, турак-жайды куруу президенттин "Аскер кызматчыларын турак-жай менен камсыздоо" программасынын алкагында ишке ашкан.
"Жаңы үйлөрдүн ачкычтарын КР президентинин аппарат башчысы Сапар Исаков, Коопсуздук Кеңешинин катчысы Темир Жумакадыров, Куралдуу Күчтөрдүн Генералдык штабынын башчысы генерал-майор Райимберди Дүйшөнбиевдер тапшырды", — деп айтылат маалыматта.
Жаңы үй комиссиянын чечими менен аскер кызматкеринин иш стажысын эсептөө, кызматтык милдеттеринин аткарылышын текшерүү жана социалдык адилеттүүлүктү сактоо принциптерин эске алып бөлүштүрүлгөн.
Андан сырткары, кийинки жылы курулушу аяктай турган 54 батирлүү тогуз кабаттуу үйдүн пайдубалын түптөөгө капсула салынган. Анда үч бөлмөлүү 18, эки бөлмөлүү 36 батир болот.
