БИШКЕК, 27-апр. — Sputnik. Украинадан чыккан профессионал модель Алиса Саросек Дубайда өтүп жаткан Queen of USSR Dubai — 2017 аттуу эл аралык сулуулар сынагында эмне себептен Кыргызстандын атынан чыгып жатканын айтып берди.
Алиса сынакка Кыргызстандан кыз жок болгондугу үчүн эмес, биздин өлкөгө жакындыгы болгону үчүн катышып жатканын белгиледи.
"Менин чоң апам Кыргызстанда төрөлгөн. Бул мамлекетке менин жакындыгым бар", — деди Саросек.
Онлайн добуш берүү боюнча 17 сулуунун ичинен Алиса 2-орунда келе жатат.
Жакында эле сынактын уюштуруучусу Ольга Пишикова учурдагы кырдаалды аталган сынакка катышууга кызыккан кыргызстандык сулуулардын чыкпай койгону менен түшүндүргөн.
Queen of USSR Dubai — 2017 эл аралык сулуулар сынагы апрель айынын башында башталган. Алисанын түпкү теги Одессадан, бирок учурда ал Дубайда жашайт. 2011-жылы ал Miss Ukraine South сулуулар сынагынын финалисти болгон.
