БИШКЕК, 27-апр. — Sputnik. Жогорку Кеңеш премьер-министр Сооронбай Жээнбековдун 2016-жылга карата отчетун канааттандырарлык деп тапты. Бул тууралуу өкмөттүн маалымат кызматынан кабарлашты.
Жээнбеков мамлекеттин социалдык жана экономикалык жактан өнүгүүсү боюнча суроолорго жооп берди. Анын ичине туризмди өнүктүрүү боюнча долбоорлор, жол-транспорт инфраструктурасы жана коррупция менен күрөшүүнүн жыйынтыктары кирет.
"Кризис абалында дагы өкмөт бюджеттин корголгон беренелерин каржылоону ишке ашырды: айлык акы, Соцфондго болгон которуулар, дары-дармекке кеткен чыгымдар, тамак-аш, жөлөк пул жана стипендия", — деди премьер-министр.
Отчет талкууга алынгандан кийин парламенттик фракциялардын лидерлери өкмөт башчыга бир катар суроолорду узаткан. Премьер-министр өз кезегинде айтылган сын пикирлер эске алынарын билдирген.
Сооронбай Жээнбеков 2010-жылдан бери отчет тапшырган экинчи премьер-министр. Биринчи Жоомарт Оторбаев болгон.
