БИШКЕК, 27-апр. — Sputnik. Чолпон-Ата шаарындагы ат майданда Issyk-Kul International Tourism Fair-Exhibition — 2017 аттуу эл аралык туристтик көргөзмө өтөт. Бул тууралуу Маданият, маалымат жана туризм министрлиги билдирди.
Маалыматка ылайык, маданий иш-чара Кыргызстандын курорттор ассоциациясы тарабынан уюштурулуп, 6-7-майда өткөнү жатат.
Көргөзмө-жарманкеде жакынкы жана алыскы мамлекеттердин туристтик агенттиктери, пансионаттары, өздөрүнүн кызматтарын сунуштайт. Андан сырткары, туризм тармагындагы инвесторлор, ишкерлер дагы катышат.
Ошондой эле бул иш-чаранын алкагында кол өнөрчүлөрдүн көргөзмөсү болот.
Катышуучуларга улуттук "Салбуурун" аңчылык өнөрү дагы тартууланып, Issuk-Kul tourism awards-2017 көргөзмөсүнүн түрдүү номинациялары боюнча жеңүүчүлөр аныкталат. Эстрада жылдыздары келген коноктордун маанайын көтөрөт.
