БИШКЕК, 27-апр. — Sputnik. Алдын ала маалыматтарга караганда, жабыркагандар туура эмес жерден өтүп бараткан. Бул тууралуу Бишкек шаардык Кайгуул милициясынан кабарлашты.
Буга чейин Абдрахманов көчөсүндөгү жол чийинден өтүп бараткан жарандарды унаа койдуруп кеткени маалымдалган.
Алар Тез жардам кызматы аркылуу саат 17.30да Бишкек шаардык травматология жана ортопедия илим изилдөө борборуна жеткирилген.
Саламаттык сактоо министрлигинин маалыматы боюнча, учурда жарандардын абалы канааттандырарлык.
18 жаштагы баланын баш мээси чайкалып, муундары жабыркаган. Ал эми 49 жаштагы кишинин колу сынып, баш мээси чайкалган.
Кайгуул милициясы Nissan Almera үлгүсүндөгү унаа айып короого токтотулганын жана анын айдоочусу 34 жаштагы аял экенин маалымдады. Дайындалган экспертиза аялдын соо экендигин көрсөткөн. Учурда тергөө иштери уланып жатат.
