БИШКЕК, 25-апр. — Sputnik. Кыргызстандын "Апамды издеп" тасмасы 30-апрелден тарта АКШда тартууланат. Бул тууралуу тасманын продюсери Майкл Арк өзүнүн Instagram баракчасына жазган.
"Фильм 30-апрелден тарта Los Angeles Convention Center театрында көрсөтүлө баштайт", — деп жазган Майкл Арк.
Буга чейин кинокартинанын жаратмандары тасма Америкада жашаган мекендештерге көрсөтүлө турганын Sputnik Кыргызстан агенттигине берген маегинде билдиришкен.
Бул кино режиссер Руслан Акундун үчүнчү толук метраждуу тасмасы. Буга чейинки "Салам, Нью-Йорк!" фильми 2013-жылы Бишкек шаарында киши көп көргөн тасма болгон.
"Апамды издеп" тасмасы Азамат аттуу баланын апасын издеп Америкага чейин барганы тууралуу тартылган. Энесин элестете албай калган Азамат Лос-Анжелестен Данияр аттуу балага жолугуп калат да, тасманын сюжети андан ары уланат. Башкы ролдордо кыргыз актеру Азамат Уланов, Жеңиш Майрамбек уулу, Казакстандын алып баруучусу жана ырчысы Тауекел Муслим жана америкалык Майкл Мапонго ойногон.
